|
Lê die dorpie Loeriesfontien aan jou oostekant,
Lambertsbaai by die
Atlantiese oseaan aan jou westelike sy, Sutherland met sy
bekende sterreprag aan die suide en die kragtige Hantamberge direk aan
die noorde? Dan is jy waarskynlik in die pragtige dorp Calvinia.
Hierdie dorp, ryk aan geskiedenis, deurdrenk met kultuur en gevul met
gemoedelike, hartlike vriendelikheid, is gestig in 1851 en vernoem na een
van die groot leiers van die Hervorming, Johannes Calvyn.
Interessante besienswaardighede soos die Hantamhuis, die Calvinia
Museum en die groot Blomposbus, is alles deel van die dorp. Met 'n
aantal heerlike gastehuise en geboue soos die Boekehuis, vind die
besoeker, toeris en kunstenaar aangename verblyf, ontspanning en tonne
inspirasie.
 Die omgewing is geseën met besondere natuurskoon. Met 'n klimaat wat
baie warm en droog kan word in die somermaande en koue winterstye, is
hierdie Karoogebied meer as uniek.
Teen die verwagting in, is daar 'n wonderlike veelsydigheid aan diere-
en plantelewe wat nét in hierdie gebied voorkom. Plante soos die
glansooggousblom, geelbotterblomme, aalwyne en kokerbome word in hierdie gulhartige
plattelandse kontrei aangetref. Bloukopdrawwertjies, die vaalkorhaan (in
Engels genoem Karoo korhaan), flaminke en groenbossangers is oa deel van die rykdom aan voëls en
bakoorjakkalse, gemsbokke en erdvarke vind 'n tuiste in hierdie
buitengewone landelike gebied.
Met al dié mooi dinge: Die besondere natuur, die Hantamberge wat in
die somer gloei van hitte en in die winter soms 'n sneeubedekte kruin
het en die gebied sprokiesagtig versier, vind die skilder, Marie Smith, groot inspirasie vir
haar geloofslewe en vir die temas en inhoud van die pragtige taferele
van haar skilderye. Sy het fyn aanvoeling vir subtiele kleurnuanses en
die veelsydige atmosfeer van dié aspekte wat haar lewe beïnvloed en vind vreugde in die
feit dat sy dit deur haar skildertalent kan deel. |
