|
Die Tankwa-Karoo lê onder aan die voet van die
Roggeveldberg en is vernoem na die rivier wat daar deurloop. Die
Khoi-woord "tanqua" beteken glo "troebel waters", "droë rivierloop",
"plek van die San" of "dorsland". Wat die park
so besonders maak, is dat jy oor 'n relatiewe kort afstand - skaars 50
km - 'n groot verskeidenheid plantegroei sien, en boonop lê dit binne
die Vetplant-Karoo-biodiversiteitsbrandpunt. Hier sien jy vanaf 'n
woestynlandskap tot ruie plantegroei aan die hange van die
Roggeveldberg. Soos jy ry, sien jy hoe dit geleidelik verander.
Verskeie besondere voëls kan in hierdie kontrei
raakgeloop word oa die skaars bloukopdrawwertjie. Dit is 'n paradys vir
voëlkykers, omdat mens die meeste van die 18 voëlsoorte wat net in die
Karoo voorkom, hier sien. Wees op die uitkyk vir die Ludwigse pou,
 groenbossanger,
namakwalangstertjie, kaneelborssanger, priritbosbontrokkie,
swartoorlewerik en die grootrooivalk. By die Oudebaaskraaldam is daar
flaminke te siene en ook bontelsies, kopereende en vaalkorhane.
Diere wat moontlik teengekom kan word is Kaapse
bergkwaggas, springbokke, gemsbokke, rooihartbeeste, bakoorjakkalse en
erdvarke.
Die atmosfeer is rustig en daar is velerlei om te ontdek.
Jy vind daar vriendelike gasvryheid, besondere natuurtonele, pragtige
oop blou lug en bo alles, rus vir jou siel.
Vir meer inligting oor hierdie wonderlike gebied,
huisvesting, en so meer, stuur gerus 'n
Navraag of skakel Tel: 027 341 1927. (Suid-Afrika) |
