My gebed vir my dierbares
|
 |
Here, vandag bring ek al my kinders, kleinkinders, skoonkinders en
agterkleinkinders na U toe. Hulle moet hul weg baan in 'n wrede
samelewing. Hulle moet besluite neem, verantwoordelikheid aanvaar vir
hul onderskeie dagtake en die aanslae van 'n wrede wêreld die hoof bied.
Here, vir elke besluit wat hulle moet neem, herinner hulle dan asseblief
daaraan dat dit so maklik is om die regte besluit te neem as hulle net
vinnig oogkontak met U maak en vra wat U sou sê. |
| |
|
|
As hulle in die versoeking kom, Heer, herinner hulle dan daaraan dat U
aan dieselfde versoekings van die bose onderhewig was as waaraan hulle
nou blootgestel word.
U weet hoe wreed die lewe ons kinders vandag
behandel – as hulle dit miskien net vir 'n oomblik vergeet en hulle laat
haal hulle oor vir 'n verkeerde daad, sien asseblief in U Groot Genade
op hulle neer en vat hulle hande en sê vir hulle dieselfde wat U al so
baie keer in my lewe vir my gesê het: “Nie daarlangs nie, My kind, kom
hierlangs. Hierdie pad is miskien moeiliker, maar Ek loop ook hierlangs
en My Hand is vir julle uitgestrek.”
Heer, en as hulle vandag na hulle werkplek of skool toe gaan, stap
asseblief saam met hulle daarin. U weet dat hulle selfs nie vir die
geringste taak opgewasse is as dit nie vir U Genade is nie. Herinner
hulle dan ook telkens daaraan dat hulle alles vir U mag vra. Ek wil
getuig, Heer, U het my nog nooit in die steek gelaat nie – ek glo dat al
wat U wil hê is dat ons net eers met U oogkontak moet maak.
Bewaar hulle asseblief teen die aanslae van die bose, Heer. Alles rondom
hulle is so aanloklik. Hulle sal U Krag in alles so nodig hê, Heer, en
ek kom vra, bou U Self vir hulle 'n weerstand op teen die versoekings
rondom hulle.
Hier is hulle nou, Here, voed hulle asseblief verder op. Laat hulle
verstaan dat geen plant mooi sal groei en vorm en vrugte kan dra as daar
nie voortdurend aan gesnoei word nie.
Heer, wat 'n wonderlike voorreg dat ek hulle aan U kan oorgee. Leer
hulle dat "snoei" 'n pynlike proses is, maar dat U die Salf van U
Spoegies aan die seerplekke smeer.
Ons Vader, ek kom vra dit alles vir U in Jesus se naam. Laat U Wil
nogtans in alles vir hulle geskied, Heer.
Heer, wanneer ek die dag nie meer vir hulle kan bid nie, hou dan
asseblief hierdie gebed van my vir hulle vir ‘keeps’!
AMEN
|
